Saturday, December 23, 2017

Biskota me xhinxher Bonbon

Kjo është hera e dytë qe i gatuaj këto biskota për këtë vit, hera e parë ishte për një event bamirësie, sot është si biskota festive e Krishtlindjeve.
Në vitet e kaluara gjithmonë kam bërë Biskotat e Krishtlindjes që i gjeni dhe në blog dhe për ato jam bërë specialiste 😊. Por me recetën që do ju prezantoj sot të biskotave tipike të kësaj feste ato me ginger, më besoni që do bëheni dhe ju specialista 😍. Kur thashë hera e dytë që i gatuaj për këtë vit duhet t’ju saktësoja që është dhe hera e dytë ne jetë që i gatuaj kaq tradicionalisht. Ndihem shumë e lumtur që përshtata një recetë që nuk do as “molassa” një ekstrakt i sheqerit të kuq (e gjeni, por me çmim pak të kripur, nëse e doni) dhe as me gjalpin në temperaturë ambjenti që biskota të dalë siç duhet. Mënyra sesi biskotat e mia me xhinxher përgatiten, nuk do ju marrë më shumë se 5 minuta. Padyshim që molassa do zëvendësohet me “shurupin e artë”, e cila mund të përgatitet edhe ditë ose javë më parë. Ruan formën, shijen për javë të tëra.
Përgatitja e biskotava siç dhe e kuptuat ndahet në dy faza, përgatitja e shurupit të artë dhe më pas biskotat. Mos hezitoni ti provoni se do përfitoni biskotat më të mira me xhinxher në formë, shije dhe ngjyrë. Më në fund dhe unë arrita ta bëja brumin e këtyrë biskotave në ngjyrën aq të bukur të karamelit, siç i shohim kur i përgatisin shefat e mëdhenj.

Përbërësit për “shurupin e artë”
400 gr sheqer
240 ml ujë
2 feta limoni dhe portokalli

Përbërësit për 50 biskota me xhinxher
130 gr gjalp
6 lugë shurup i artë
120 gr sheqer kaf
1 kokërr vezë

Përbërësit e thatë
350 gr miell
½ lugë çaji sodë buke
1 lugë çaji xhinxher pluhur
1 lugë çaji kanellë pluhur
½ lugë çaji karafil pluhur
½ lugë çaji arrë moskat pluhur

Përgatitja
Fillojmë me përgatitjen e shurupit. Fillimisht shtojmë 100 gr sheqer dhe 25 ml ujë në një tenxhere të vogël. E lëmë të ziejë derisa uji të avullojë dhe sheqeri të fillojë të karamelizohet.
Shtojmë ujin dhe sheqerin e mbetur, fetat e limonit dhe portokallit dhe ziejmë për 15 minuta. E heqim shurupin nga zjarri dhe e hedhim në një kavanoz të pastër. Fillimisht shurupi do duket i hollë, por kur ftohet masa bëhet si mjalt. Me këtë masë shurupi mund të përgatisim dy herë këtë recetë me biskota. Shurupi duhet të jetë tërësisht i ftohtë para se ta përdorim tek biskotat.








Faza e dytë: Fillojmë me përgatitjen e brumit të biskotave. Në një tenxhere shtojmë gjalpin, shurupin e artë, sheqerin kaf dhe i vendosim në zjarr derisa përbërësit të jenë tretur, kryesisht gjalpi. Pasi përzierja ftohet (e vakët) e hedhim mbi  përbërësit e thatë miellin, erëzat, sodën. Shtojmë vezën dhe me një lug druri trazojmë. Për më pak se 1 minutë përzierje i gjithë brumi do mblidhet si në foto. Brumi është gati. E mbledhim me qese gatimi dhe e fusim në frigorifer për të paktën 30 minuta.









Për të përgatitur biskotat kemi dy mënyra ose do lyejmë banakun me miell sa herë do hapim brumin si dhe pecin e trashë që sherben për të sheshuar brumin ose metoda më efikase dhe e pastër është nëse brumin e biskotave pjesë-pjesë, e vendosim midis dy letrave pjekëse dhe me pec e sheshojmë sipër. Në këtë mënyrë përfitojmë dhe trashësinë e duhur të brumit dhe nuk bëhemi shumë rrëmujë në këndin e punës.


Sa herë që u japim formë biskotave, duhet që buzët e formave t'i lyejmë me miell, ndaj në një enë hedhim pak miell dhe e vendosim pranë këndit të punës . Fillojmë japim forma sipas dëshirës.

















Pjekim në 190 gradë për 12 minuta. Biskotat duhen ftohur pak përpara sesa ti vendosni në pjatancën e servirjes. Ju bëftë mirë. Gëzuar!






SHARE:

Sunday, December 10, 2017

Panetone sipas Bonbon

Nuk e kisha menduar ndonjëherë që një nga ëmbëlsirat më të dashura për mua, në dukje e pamundur për t’u gatuar në shtëpi, mund ta gatuaja vet pa nevojën e asnjë pajisje të komplikuar si “Kitchen Aid” apo pajisjen  e bukëpjekjes (nuk kam asnjë nga këto dy pajisje në shtëpi).
Receta që unë kam zgjedhur në dukje e komplikuar, nuk ka ndonjë vështirësi nga ëmbëlsirat e zakonshme, përveç kohës dhe punimit të ardhjes së brumit.
Përbërësit janë bazikë, përbërës që i kemi të gjithë në shtëpi. I vetmi produkt që unë e gjeta tek Conad, por ka dhe tek SPAR është mielli “MANITOBA”, miell që ndihmon proçesin e ardhjes së brumit, më shumë se mielli i zakonshëm. Ndaj blijeni miellin për të patur një rezultat më të mirë. Mbushjen e panetones mund ta bëni me copa çokollate, me rrush të thatë të një cilësie të mirë dhe lëkurë portokalli e sheqerosur (por kjo duhet përgatitur më parë dhe une nuk e kisha gati 😊).
Unë përgatita dy panetone një me rrush të thatë dhe një me copa çokollatë. Ne kemi provuar vetem atë me rrush të thatë, tjetrën e përgatita për kolegët e mi dhe e provojmë nesër 😊.
Letrën e panetones e gjeni tek Neranxi për 40 lekë/copa.
Përgatitjen e panetones do e ndaj në 3 faza dhe përbërësit në dy faza për t’ju orientuar më mirë. Gjithashtu po postoj dhe linkun, ku u bazova për panetonen, me disa ndryshime të vogla që i përshtata vet. https://www.youtube.com/watch?v=vuOUU3z3xAQ&t=444s

Përbërësit për fazën e parë:
Për përgatitjen e majasë:
30 ml ujë i vakët
1 lugë çaj mjaltë
10 gr maja birre
40 gr miell
Përbërësit e tjerë:
120 ml ujë
60 gr gjalp i shkrirë
2 të verdha veze
120 gr sheqer
350 gr miell (50% miell Manitoba, 50% miell tipi 00)

Përbërësit për fazën e dytë:
1 e verdhë veze
20 gr sheqer
60 gr gjalp brumë në temperaturë ambjenti
50 gr miell
150 gr copa çokollatë ose 150 gr rrush i thatë

Kohëzgjatja: 10 orë

Përgatitja Faza e Parë

Fillojmë me përgatitjen e majasë. Në një tas shtojmë ujin e vakët, tresim mjaltin. Majaja që shikoni në foto është 25 gram, ndaj ndajeni për të marrë 10gr që nevojitet. Treteni dhe majanë tek përzierja me mjaltë. Shtoni miellin, trazoni. Mbulojeni tasin me qese dhe lëreni për të paktën 30 minuta sa përzierja të vijë, të dyfishojë masën e saj si në foto.




Këtu masa e majasë është gati.
Në një tas të madh ku kemi shtuar 120 ml ujë të vakët, shtojmë sheqerin dhe fillojmë trazojmë më dorë. Hedhim masën me maja, shtojmë vezët dhe përziejmë. Shtojmë gjalpin, miellin avash avash dhe punojmë masën me dorë. E hedhim brumin mbi tavolinën e punës të spërkatur me miell dhe e punojmë për disa minuta derisa brumi të mos jetë më ngjitës dhe të hapet si në foto.









Faza e parë mbaron këtu. E vendosim brumin në një tas të madh. E mbulojmë me qese dhe një mbulesë dhe e vendosim në një vend të ngrohtë për të paktën 2 orë thotë Benedetta në video. Unë e lashë për gjithë natën. 

Përgatitja Faza e Dytë:
Nxjerrim masën e brumit që ka disa orë që vjen. E hapim me dorë dhe mbi të hedhim vezën, sheqerin dhe punojmë me dorë. Më pas shtojmë pjesë pjesë gjalpin në temperaturë ambjenti dhe vazhdojmë ta punojmë me dorë. E vendosim masën e brumit mbi tavolinën e lyer me miell dhe punojmë me dorë për disa minuta. Në fund me dy palosje shtojmë frutat e thata ose copat e çokollatës. Në rastin e rrushit të thatë duhet ta zhysim për disa minuta në ujë të vakët që të zbutet. E shtrydhim mirë para se ta hedhim tek brumi dhe e pluhurosim përsipër me miell. Brumi është gati për tu vendosur në letrën e pjekjes.





















I mbulojmë me qese si në foto dhe i fusim në furrë të ngrohur në temperaturë 30 gradë për 4 orë. Furra duhet të rrijë gjithë kohës në temperaturë 30 gradë. Pas 4 orësh rezultati është ky. Aromën ndërkohë duhet ta imagjinoni vet 🤗.




 Përgatitja Faza e Tretë:
Faza e tretë është pjekja. Përpara se t’i fusim për të pjekur, me majën e thikës bëjmë një të prerë në formë kryqi mbi panetone. Në zemër të saj vendosim një copë gjalpë e cila do ndihmojë edhe më shumë ardhjen e panetones gjatë pjekjes. Vendosim panetonet bashkë të dyja fillimisht në 190 gradë për 10 minuta, pastaj në 160 gradë për 40-45 minuta. Panetonja duhet ftohur tërësisht përpara se ta hani. Benedetta tregon një mënyrë të sajën në video siç bëjnë gjithë shefat e mëdhenj, por unë i lashë të ftohen normalisht mbi banak 😍

Nuk është 100% panetonja që blini gati, por është panetonja më me dashuri që keni ngrënë ndonjëherë. 

Ju bëftë mirë dhe GËZUAR FESTAT E NJË VIT TË RI TË MBARË PËR TË GJITHË JU. JU DUA







SHARE:
Blogger Template Created by pipdig