Yshmeri Bonbon

Yshmerin ashtu siç "duhet" mami Lika e bën për pashkë ose kur rastis të sigurojë qumësht “kulloshtër”, që është qumështi i lopës që sapo ka sjell në jetë një viç :). Yshmeri që mami gatuan për pashkë, nëse nuk kemi kulloshtër bëhet me qumësht dele, vezë fshati, petë të pjekura të përgatitura vet dhe djath nape që i përngjan mocarelës në kushte shtëpije.

Nëse do kem shansin këtë pashkë ta fotografoj yshmerin e mamit se për të ngrënë as që e diskutoj ☺, do e risjell recetën me emrin e mami Likës. Për momentin do t’ju prezantoj versionin tim modest të përgatitjes së recetës dhe që fëmijët e mi e pëlqejnë shumë.

Receta ime ka të përbashkët me mamin gjalpin e shkrirë (që na e bën Lena, halla e mamit) dhe vezët e fshatit, përbërësit e tjerë blihen në dyqan 😊. Shija nuk i afrohet 100% yshmerit të mami Likës, por prap është shumë e mirë 🙃.

Përbërësit:

Petë të pjekura

5 vezë

1 e ½ litër qumësht

200 gr ricotta ose djath pa kripë (mozzarella)

2-3 lugë gjelle gjalp i shkrirë

Vaj misri, kripë

Përgatitja:

Thyejmë me dorë petët e pjekura në tepsinë ku do pjekim yshmerin.

Në një tas rrahim vezët, shtojmë gjizën ose djathin e butë, hedhim qumështin dhe rregullojmë me kripë. Me një garuzhde fillojmë të njomim gjithë sipërfaqen e petëve. 
Kjo recetë mund të bëhet e gjitha me gjalp, por kur ftohet gjalpi ngrin, ndaj dhe unë e bëj gjysëm për gjysëm vaj  & gjalp, që të ruajë butësinë edhe kur ftohet.

Shtojmë vaj (një filxhan kafe) dhe gjalpin e shkrirë në thërrmija ja hedhim sipër.

Bëni kujdes kur e prisni gjalpin e shkrirë nga shishja se mos prisni dorën si unë🤥 

Pjekim në 220 gradë në fund të furrës, derisa yshmeri të marrë ngjyrë të artë. Gjatë pjekjes prej vezëve pjesa sipër mund të fryhet si tullumbace 😊, mos u shqetësoni do bjerë sapo të mbaroj pjekja (po të doni mund ta ç‘poni me majën e thikës ☺).

 Ju bëftë mirë.