Vetëm një javë nga nata e ndërrimit të viteve, duhet të fillojmë të
mendojmë se çfarë antipastash, sallatrash do duhet të përgatisim, sidomos kur
rreth tavolinës tuaj do mblidhen shumë familjarë. Meqë tek kaposhi detit dhe përsheshi
nuk eksperimentojmë dot, as në pjekje dhe as në erëza, sepse im atë nuk toleron eksperimente
në këtë pikë, nuk më mbetet veçse të merrem vet me disa prej antipastave që për
tim atë mund të jenë humbje kohë, por ama për gjithë pjesën tjetër të tavolinës
janë të bukura për syrin dhe të shijshme dhe të veçanta, përpara se të vijnë
tek e paevitueshmja kaposhi detit me përshesh :))).
Ndaj, në dy tre postimet e ardhme do merremi vetëm me antipastat, duke
shpresuar t’ju shërbejnë si ide dhe t’ju tundojnë t’i provoni :).
Hummus, do të thotë qiqra në gjuhën arabe dhe qiqra është baza e kësaj
salce “dip”. Për herë të parë hummus e kam provuar 16 vjet më parë në Angli dhe
shija e saj krejt e veçantë më është dukur si krem lajthish :). Sigurisht, në
ato momente nuk i jepja dot drejtim shijes sepse se pari, vet qiqra si produkt
nuk është se ishte përdorur shumë nga mamat tona në vitet 2000 dhe së dyti, sepse
shijen ndryshe dhe të veçantë hummus e merr nga “tahini paste” ose salca/kremi i
farave të susamit. Tahini mund të përgatitet dhe vet (unë nuk e kam bërë asnjëherë),
për aq kohë sa është lehtësisht e gjetshme tek Neranxi me një çmim rreth 600
lek.
Përveç tahinit, përbërësit e tjerë të hummus janë lehtësisht të
gjendshëm në shtëpitë tona. Hummus mund të shërbejë si një “dip”, domethënë salcë
kryesore ku mund të zhysësh perime të gjalla, si karrota, kastravec, rrepa,
selino etj ose në përgatitjen e piteve të ndryshme siç përdorim salcën e kosit.
Unë sot do e sjell në versionet më poshtë.
Përbërësit për hummus
1 vazo me qiqra
1 kokërr limoni
2 lugë gjelle tahini
2 thelpinj hudhër
3-4 lugë gjelle vaj ulliri
1 lugë kafe pluhur kumini (opsionale)
Kripë
Përgatitja
E mira e kësaj recete, pas gjithë atyre të panjohurave që lexuat më
lart :), është se përgatitet e tëra në një mikser. Shtojmë qiqrat, limonin,
hudhrën, kumin, vajin e ullirit, tahinin dhe miksojmë. Në këtë pikë, në çdo
recetë që mund të shihni në internet për hummusin, do ju thonë se gjatë
miksimit hummus duhet provuar disa herë për t'u parë për kripën, hudhrën, për athëtinë nga limoni, apo për shijen e veçantë të pastës së tahinit. Kështu që,
sipas shijes tuaj personale kur përzjeni hummusin mund të shtoni më shumë
limon, kripë apo tahini, që të përfitoni shijen e dëshiruar. Nëse salca ju duket pak e trashë, mund ti shtoni 1 apo 2 lugë ujë, përzjeni derisa të krijohet
një krem i qëndrushëm si në foto.
E hedhim hummusin në tasin e servirjes dhe mund ta përdorim kështu
siç është, duke zhytyr perimet në të.
Për një prezantim “profesionisti” :), unë e shërbeva mbi rrepat e kuq
dhe mbi kastravec. Shijoni fotot. Ju bëftë mirë.
No comments
Post a Comment