Tava e kosit është një gatim që ne nuk e bëjmë shpesh, ama kur e bëjmë
e bëjmë se vërtet na ka shkuar mendja. Duke qenë pjata tipike dimërore, nepsi na
trokiti në derë :). Tava e kosit mund të gatuhet me mish pule, mish viçi të vogël,
por mami Lika e bën gjithmonë me mish qingji, kështu edhe ne. Mishi dhe vezët
duhet të jenë të freskëta domethënë tamam prej fshati :), për shijen e vertetë
të tavës së kosit. Mishi qingjit është mish me yndyrë, ndaj unë megjithëse
sigurohem të gatuaj pjesë që nuk kanë shumë dhjamë, por dhe nëse ka pak a
pastroj dhe atë. Ajo që dua t’ju këshilloj
kur gatuani tavën e kosit, është që bëjeni atë gjithmonë në fundjavë, kur e
gjithë familja është e mbledhur, pasi tava nuk mund të gatuhet në darkë për tu
ngrënë të nesërmen në drekë, siç bëjmë ne mamat shpesh gjatë javës që familja të
gjejë drekën gati, kur ne jemi ende në punë.
Përbërësit
1 kg mish qingji
4 vezë
1200 ml kos
2 lugë miell
1 filxhan kafe oriz
1 lugë gjalp
Kripë, piper
Përgatitja
Vendosim
mishin e qingjit në një tenxhere me dy lugë vaj dhe kaurdisim sa mishi të marrë
ngjyrë dhe të thajë lëngjet e veta.
Pas kësaj hedhim dy gota plot me ujë dhe e lëmë mishin të ziejë. Në një
tas rrahim 4 vezë me kripë. Shtojmë kosin dhe përziejmë derisa të krijohet një
masë kremoze. Hedhim dy lugë miell dhe trazojmë.
Në
tavën ku do hedhim masën, siç thotë mami Lika hedhim 2 grushta oriz (1 filxhan
kafeje). Mbi to vendosim mishin.
Rregullojmë
me kripë lëngun e mishit dhe ja shtojmë kosit. Të gjithë këtë masë e hedhim tek
tava. Gjalpin e copëtojmë ne copa të vogla dhe ja hedhim sipër. Hedhim piper.
Pjekim në temperaturë maksimale, në mes të furrës për të paktën 1 orë
ose derisa tava të marrë ngjyrë të artë. Shërbejmë 5 minuta pasi kemi hequr
tavën nga furri. Ju bëftë mirë.
No comments
Post a Comment