Biskota të kripura me fara sipas Julit

Nëse ka një gjë për të cilën të gjitha ne mamatë që punojmë mund të biem dakort në kuzhinë janë sa më shumë receta që nuk na kërkojnë ti rrimë strikt përmasave apo përbërësve dhe që sjellin shije për gjithë familjen. Pale kur janë dhe të shëndetshme si receta që do ju sugjeroj sot. Do mbani të gjitha shënim për ti provuar dhe për ti bërë pjesë të dietës tuaj 😋🤗. Kjo recetë vjen nga Kanadaja e largët, nga Juli. Unë me Julin nuk jemi shoqe, por motra që ndajmë pasionin për kuzhinën, sidomos për gatimet e shëndetshme ajo është mentori im. Më sugjeron gjithë recetat të cilat janë “të bëshme” në Shqipëri. Pasionet e Julit nuk ndalojnë vetëm tek kuzhina, ajo e meriton shprehjen “çfarë i sheh syri i bën dora” për punëdore dhe dekorim. Këtu ndahem unë me Julin, por mua më plotëson gjysma ime në këtë pikë, ndaj mua do më shihni të bëj art vetëm mbi pjata 😍🤗. Le të vijojmë me recetën e cila është “customizable” dhe e dashurova këtë fjalë që përdori Juli për të më thënë që fara dhe erëza hidh ça të kesh dhe ça të duash 😋🤩.

Përbërësit:

200 gr miell thekër & miell tërshërë

2 lugë gjelle fara chia

2 lugë gjelle fara lini

2 lugë gjelle fara luledielli

2 lugë gjelle fara susami

1 lugë gjelle vaj ulliri

1 lugë çaji tumerik

1 majë luge gjellë kripë

1 gotë ujë

Përgatitja:

1 orë para vendosim farat chia në ujë derisa ato të zbuten. Më pas shtojmë 1 nga 1 gjithë përbërësit si në foto dhe në fund miellin. Miell mund të duhet më shumë apo më pak në varësi të lidhjes së brumit. Brumi do jetë pak ngjitës por nuk ka gjë.  

  

Lyeni duart tuaja me vaj ulliri dhe hapeni brumin mbi një letër për pjekje sa më hollë të mundeni. Priteni në copa dhe piqeni në 180 gradë, për 30 minuta apo derisa të përfitoni “tharjen” e dëshiruar të biskotës.  

Këto bisktota mund ti konsumoni në mëngjes, drekë me sallatë ose si snack kur doni të thyeni urinë. Mbahen shumë kollaj me vete dhe ju sigurojnë një ushqim të shëndetshëm. ❤🙏🤗

Biskota me tërshëre dhe mollë

Këtë recetë mezi prisja ta ndaja që mbrëmë në story në Instagram me ju, por meqë e kisha filluar ditën e dielë vetëm me gatime me tërshërë thashë të mos e ekzagjeroj 😍.

Meqë tashmë e dini që këto kohë po tregohem e kujdesshme ndaj ushqimit (për ti hequr ca kg) mendja më punon si të ha biskota, por që të jenë 100% healthy. Nuk mendoj vetëm për biskotat, por për çdo vakt në mënyrë që mos të më kthehet e ngrëna në bezdi. Tërshëra është një nga ato përbërës që për mua si person dembel në mëngjes më zgjidh vaktin dhe më mban mirë deri në drekë. Që mos ta hamë përditë o versionin “trahana” o version me kos ose qumësht dhe fara, këto biskota janë zgjidhja ideale. Unë i përgatita me 3 përbërës të tjerë, por ju kur vjen fjala për të shtuar fara të thata mund të shtoni çfarë t’ju gjendet në raftet tuaja të kuzhinës. Mua më pëlqeu shumë version im madje nuk i shtova as kanellë 🤗.

Shkak për këtë recetë u bënë disa mollë që kishin dy javë që rrinin në frutierë. Që kur fillojnë hurmat me farë dhe mandarinat, frutat e tjera sikur i evitojmë ti përdorim. Ndaj me rastin e spastrimit të mollëve sajuam dhe këtë recetë që do më sigurojë 3-4 mëngjese 😋.

Përbërësit:

3-4 kokrra mollë

150-200 gr tërshërë

100 gr arra të pastruara

6 - 8 kokrra hurma arabie

Pastrojmë mollët nga farat dhe lëkurat. Nëse keni një grirës të vogël si imi proçesin e grirjes e bëni në dy apo tri masa. Shtoni mollë, tërshërë, arra dhe hurma. Grini dhe kaq 🤗.

Në një tavë shtroni letër për pjekje, hidhni masën e biskotave, e shtroni me lugë dhe e prisni në kubikë para se ta piqni.

I piqni në 180 gradë për 30-40 minuta në varësi se sa të “thara” i doni. Për këtë arsye i kontrolloni herë pas herë. I lini të ftohen dhe paketoni mëngjesin tuaj dhe copat e tjera i vendosni në një kuti me kapak. Shijojini dhe paçi një fundjavë plot diell 🤗❤🙏.