Involtini

Involtini është një recetë që çdo familje e ka në traditën e saj me mbushje të personalizuara sipas shijes. Meqë është recetë familjare vendosa ta ndaj në blog për lexuesit e mi, ndërkohë ndjekësit në Intstagram (kliko), e gjëjnë dhe në highlight me video.

Involtini mund të përgatitet me mish të kuq (gici apo viçi) dhe pule. Unë zgjodha ti gatuaj me biftek gici dhe ti mbush me proshutë dhe djath për pizza. Mbushjet brenda involtinit mund të bëhen dhe me perime si karrotë, selino, spinaq, qepë duke i vendosur perimet në shirita, në mënyrë që ta kemi më të lehtë mbledhjen e tyre. Që mos t’ju lodh shumë se të gjithë jemi “dembelë” pas pushimeve të gjata, receta e involtinit më poshtë:

Përbërësit:

8 biftekë

8 fije proshutë cotto ose crudo

16 feta djathi

2 thelpinj hudhër

Borzilok

Kripë, piper

3 lugë gjelle vaj ulliri për gatim

1 filxhan kafe verë e bardhë (opsionale)

1 filxhan kafe ujë

Perime për servirje sipas dëshirës

Përgatitja:

Rrahim biftekët me rrahësen e mishit dhe i lyejmë me kripë dhe piper. Marrim një nga biftekët e vendosim në tavolinën e punës dhe mbi të shtrojmë prodhutën dhe djathin. Mbledhim si në foto. Shkopinjtë për lehtësi i vendosni në anësore të involtinit në mënyrë që ta keni më të kollajtë kthimin gjatë kaurdisjes.

Vendosim tiganin në zjarr ku shtojmë vajin e ullirit, thelpinjtë e hudhrës dhe borzilok të tharë. Kur vaji aromatizohet shtojmë involtinit dhe i kthejmë nga ana tjetër kur të fillojnë të marrin ngjyrë. Në këtë moment i vendosim kapak dhe i lëmë të gatuhen në flakë mesatare. Involtini do të lëshojë lëngjet e veta pas venosjes se kapakut dhe djathi do fillojë të shkrijë pak. Provoni shijen e lëngut. Nëse ju pëlqen shtoni vetëm gjysëm gote ujë dhe e lini mishin të zbutet me kapak për rreth 20 minuta. Nëse mendoni se pak alkol do i shkontë më për shtat shijes i shtoni 1 filxhan kafe verë të bardhë.

Meqë unë përdora proshutë krudo, nuk i shtova verë sepse vet proshuta ka një shije të fortë që aromation gjithë gatimin.

Kur gjella të ketë shteruar gjysmën e lëngut të vet involtinit janë gati për tu servirur me perime të zjera sipas dëshirës. Ju bëftë mirë.

Bukë Pashke sipas Bonbon

Që thoni ju e ndava mendjen të ribëja bukën e pashkës që e kam përgatitur 2 vite më parë, kur zyrtarisht u prezantuam bashkë me mami Likën dhe çunat si “Skuadra Bonbon Taste” në Top Channel. 

Aty ishim të ftuar për 2 gatime të festës së Pashkës, ku mami Lika u prezantua me yshmerin e ëmbël, ndërsa unë me bukën e Pashkës. Këtë recetë nuk e kisha sjellë ndonjëherë për lexuesit e blog dhe për t’ju lehtësuar 30 minuta video në youtube 😍, prej sot e gjeni këtu në ditarin e gatimeve të familjes time.

Për të rikujtuar dhe momentet e dy viteve më parë, kam përzgjedhur dhe foto të asaj dite 🤗.

Tani, mirë që ndava mendjen të bëja bukën e
Pashkës që ta keni gati për gatimet e kësaj feste, por vendosa që vezët t'i “skuqja” në mënyrë natyrale sic na sugjeroi mikja jonë në instagram Bruna e cooking_with_bruna. Por më dështuan me sukses 😝.

Siç tha dhe Bruna suksesi i ngjyrosjes natyrale të vezëve varet shumë nga lëvozhga e saj. Të miat nuk donin që nuk donin të merrnin ngjyrë ahaha, ndaj përfunduan portokalli me ngjyrën e vetme që më gjendej në shtëpi nga viti i kaluar. Nga fotot do e kuptoni dhe vet që dhe me vezë portokalli bukët individuale të Pashkës shkëlqyen ❤.

Meqë do kemi miksim fotosh të sot dhe dy viteve me parë, do kemi dhe bukë pashke me vezë të kuqe. Më ndiqni me recetën më poshtë.

Përbërësit:

120 ml qumësht

80 gr sheqer kafë

1 paketim maja pluhur 

50 gr gjalp

2 kokrra vezë

1 majë luge çaji kripë

450 gr miell

1 lugë çaji kardamom

1 lugë çaji mahlep

Vezë të zjera me ngjyra

Dashuri ❤❤❤

Përgatitja:

Tresim gjalpin dhe shtojmë qumështin. Sigurojmë që masa të jetë e vakët në temperaturë. Shtojmë sheqerin, kripën dhe majanë dhe e lëmë masën e lëngshme në qetësi për disa minuta. Shtojmë miellin, 1 kokërr vezë, erëzat kardamom dhe mahlep (të dyja këto i gjeni në versionin pluhur tek Neranxi). Hedhim miellin dhe fillojmë e trazojmë masën me dorë dhe shtojmë miell derisa të përfitojmë një masë brumi të butë që na lë duart e pastra. E punojmë brumin për disa minuta më dorë dhe më pas e vendosim në një tas të lyer me vaj. E mbulojmë me një pecetë dhe e lëmë 1 orë në temperaturë ambjenti.

Ah kjo e verdha e vezës së freskët nuk ka të paguar. 😋

Pas një ore, e ndajmë brumin në copa të barabarta, por numër çift, meqë gërshetat që do mbledhim duhet të jenë me shirita dy nga dy. Para dy vitesh me këtë masë mielli kam nxjerrë 3 bukë të mëdha individuale, ndërsa sot 6 të tilla sepse i bëra gërshetët më të vegjël 😍.

Hapini topthat e brumit si në foto. Merrni shiritat 2 nga 2. Puthitini mirë në krye dhe vijoni përdredhjen e tyre tek njëri tjetri, më pasi jepini forma rrethore duke krijuar bukën e vogël.

I vendosni “bukuritë” në tavë dhe mbulojeni tavën përsëri me pecetë dhe e lini të vijë në qetësi dhe për 1 orë tjetër. 🙏

Përgatisni një “eggwash” ose të verdhë vezë të holluar me pak ujë dhe me një furçë, lyeni bukët sipër. Nëse keni susamë shtojani sipër, nëse jo nuk është fundi i botës. As unë nuk kisha 🤩. Në këtë moment merrni vezët e ngjyrosura, i lyeni ato me vaj dhe i vendosi në mes të bukës.

Ky është momenti i shumëpritur, pjekja e tyre në 180 gradë për 25-30 minuta.🙏

Dhe ndërkohë që ka qindra receta për bukë Pashke në botën e madhe të informimit dhe recetave, gëzojuni dhe shijoni një gatim të gatuar në shtëpi me shumë dashuri në mbledhjet tuaja familjare. GËZUAR PASHKËT 🙏🙏🙏. JU DUA ❤❤❤❤