BonBon Taste

Kjo recetë pret që në datën 5 tetor 2020, (datën e lindjes së Henrit) ditën e postimit 😊. Dhe do ishte shumë më e kollajtë për mua ta kisha shkruar që atë ditë sesa të prisja kaq muaj dhe të rrija një javë të zbardhja bisedat dhe audiot e dërguara me Elvën e Sofia Sweets 8 muaj me parë, e cila e gdhiu me mua dy ditë për ta përfunduar tortën së bashku.

Dhe si përfundim unë nuk arrita ta merrja vesh shijen tamam sepse më kapi Covid dhe isha 1 muaj pa shije dhe pa nuhatje. Amaaa kush e provoi, Elva e para tha që ishte një mrekulli. Të tjerët që e shijuan thanë si tortat me çokollatë të Pastelitos 😊.

Veçse madhësia e kekut tim blihet me çmim shumë të kripur atje 😊. Kjo tortë jo se shkoi lirë, do i rendis çmimet, por tortat e ditëlindjes të bëra në shtëpi janë si mini projekte që të gëzojnë kur i realizon me sukses. Kosto për këtë tortë pa renditur aksesorët si qese për kremin apo kartonin e tortës të cilat mi siguroi Elva shkoi:

Kosto e përbërësve të tortës:

1 kg miell i gatshëm për torta dhe 500 gr butona çokollatë – 900 Lek

500 gr Mascarpone - 500 Lek

Nutellla – 700 Lek

Pana e ëmbël – 300 Lek

Pralina për zbukurim - 300 Lek

Frutat e pyllit – 700 Lek

Total – 3400 Lek

Po vijoj direkt me recetën se boll pritët ju dhe unë bashkë hahaha

Përbërësit për Kekun e Tortës:

500 gr miell i gatshëm për torta

150 gr vaj luledielli

200 ml qumesht ose ujë

Shënim: Përgatiten dy kekë të tillë. Masat më lart janë për vetëm një kek. Dmth do e përgatisni masën më lart dy herë pra në total do ju duhet 1kg miell, 300 gr vaj, 400 ml qumësht ose ujë.

Përbërësit për kremin mbushës me mascarpone dhe nutella:

400 gr mascarpone

200 gr Nutella

Përbërësit për ganash:

500 gr çokollatë e zezë

250 gr pana e ëmbël

Përgatitja:

Për të përgatitur këtë tortë duhet ta filloni punën një ditë më parë, të paktën me pjekjen e kekëve të totës. Unë do ju sugjeroja miell për kek të gatshëm që e nxjerrin kekun shumë të shkrifët dhe të butë. Unë e bleva me sugjerimin e Elvës tek një kompani që shet produktet pastiçërie, BBI (emri i dyqanit).

Përgatisni brumin sipas përmasave më lart. Vendoseni masën në një tavë që nuk ngjit me diametër 20 cm. Unë përdora një unazë keku e cila gjendet lehtësisht kudo. Unazën e mbështolla me letër alumini në fund duke ja puthitur mirë anët dhe e mbështeta në një tave më të madhe. Hedhim masën e kekut në unazë, e pjekim në furrë të parangrohur në 180 gradë dhe nuk e hapim furrën asnjë moment. Për 45 minuta keku është i pjekur. E nxjerrim kekun e lëmë të ftohet tërësisht në temperaturë ambjenti dhe më pas e mbledhim me membranë derisa të fillojmë ndërtimin e tortës.

Kështu veprojmë dhe me pjekjen e kekut të dytë.

Kremin ganash është mirë dhe këtë ta përgatisim një ditë më parë. Vendosim panën e ëmbël për tu nxehur. E heqim nga zjarri sa fillojnë bulëzat. Panën e nxehtë e hedhim mbi butonate e çokollatës (të blera dhe këto tek BBI) dhe trazojmë sa tretet e gjithë çokollata. Vendosim membranë me kontakt mbi ganashin dhe e lëmë të ftohet në temperaturë ambjenti për gjithë natën. Nëse na duhet që ganashin ta përgatisim ditën qe do ndërtojmë tortën, pasi ftohet e vendosim në frigorifer dhe kur e nxjerrim e rrahim me rrahësin elektrik derisa masa fillon e fiton volum. Kështu veprova unë 😊.

Kremin me mascarpone dhe nutela e përgatisim thjesht një orë para ndërtimit të tortës. Rrahim mascarponen me nutela. E lëmë në qetësi rreth një orë. Nëse është vap kremin me mascarpone pasi ta përgatisni e fusni në frigorifer tek pjesa e freskisë. Më pas për lezet po të dëshironi shtoni butona çokollate. Ky krem do mbushë hapësirën më të madhe të tortës dhe çopat e çokollatës që do shtoni do jenë një surprizë kur njerëzit tuaj të dashur të shijojnë tortën.

Duket sikur gjithçka është gati le të fillojmë ndërtimin e tortës fillimisht duke ngritur vendin e punës. Mbi kartonin ku do servirim tortën vendosim unazën ku poqëm kekun, rrethojme si në foto me letër gatimi dhe jemi gati për shtrim. Presim kekët në 2 shtresa duke krijuar kështu 4 disqe që do jenë dhe katet e tortës. Mbushim si kaushe dy qesë një më kremin me mascarpone dhe tjetrin me ganazh dhe fillojmë punën.

Vendosim pak krem në fund mbi kartonin e tortës para se të vendosim diskun e parë të kekut. Njomim me delikatesë me pak qumësht (kështu preferova unë), por ju mund të bëni pak shërbet. Unë evitova këtë të fundit 😊.

Me kaushin ku keni kremin ganash filloni e mbushni anët e tortës. Më pas mesin mbusheni me kremin me maskarpone. Vijoni kështu me shtresat e kekut derisa të vendosni diskun e fundit të cilin do e patinoni pak me ganazh dhe do e fusni kështu siç është në frigorifer që keku dhe kremi të bëhet më solid. Pas disa orësh të paktën 2-3 orë, nxirreni tortën e cila ështe bërë e qëndrushme dhe suvatojeni me kremin ganash të mbetur me anën e një spatule. Kremin ganash ndërkohë që torta ka ndejtur në frigorifer e mbuloni përsëri me membranë me kontakt derisa ta përdorni për suvatim 😊.