Strudel me mollë (Vienez)

Siç e theksoj sa herë që përgatis ëmbëlsira me mollë, këto gatime i kushtohen gjysmës time Bledit. Dje tek i pyesja fëmijët a e gjen kush se çfarë ëmbëlsire surprizë do ju gatuaj, asnjëri nuk ju afrua përgjigjes së saktë. Kur u dhashë ndihmën që është nga ëmbëlsirat e preferuara të babit lëshuan një “oooooooiiiiiiii ëmbëlsirë më mollë” hahahah.

Sa herë që kam përgatitur strudel kam përdorur petë të gatshme pasi më dukej e vështirë të krijoja petë të holla dhe të shkrifta siç i do një strudel i vërtetë. Por kur ke shoqe si Esmeralda e “Si Shijon” që të orienton në receta të vjetra, nga ato të gjyshes e merr mundimin të gatuash një recetë strudeli prej andej nga ka dhe origjinën, nga Viena, duke marrë parasysh që dhe mund të dështoje në hapjen aq të hollë të petës 😍. Më duhet të them që godita në shenjë që me herën e parë 🤗. Peta u hap si tullumbace dhe u surprizova për mirë që një nga teknikat e bërjes së brumit sa më elastik, e përdorur nga gjyshet vieneze, e kam mësuar nga mami Dyshka, mama e Ledinës, shoqes time. Përplasja e brumit disa herë mbi tavolinën e punës ndihmon në aktivizimin e glutenit dhe ndoshta  nuk  kemi ditur t’i japim shpjegimin kimik të proçesit, ama mamat tona e njohin shumë mirë teknikën e përfitimit të një brumi elastik dhe të shkrifët. Le të vijojmë me përbërësit të cilët do i ndaj në dy kategori, për brumin dhe për mbushjen.

Përbërësit për brumin:

80 ml ujë i vakët

1 e ½ lugë gjelle vaj për gatim

1 lugë çaji lëng limoni apo uthull

1 majë luge çaji kripë të imët

150 gr miell (miell për bukë ose çdo lloj tipi tjetër)

Përbërësit për mbushjen:

3 lugë gjelle gjalp

80 gr galetë e imët ose 2/3 e kupës

5 lugë gjelle sheqer

½ lugë çaji kanellë

50 gr ose 4 lugë gjelle rrush të thatë

3-4 kokrra mollë

Lëngu i gjysëm kokrre limoni

Gjalp i tretur për të lyer petën

Sheqer pluhur

Përgatitja:

Hapi i parë në këtë ëmbëlsirë delikate është përgatitja e brumit i cili do 1 orë të rrijë në qetësi.

Në një tas shtojmë ujin e vakët, uthull në rastin tim dhe vajin dhe gjysmën e sasisë së miellit (unë e bëra me miell buke Fieri 🤗) dhe trazojmë më lugë druri derisa të krijohet një masë kremi si për petulla. E përziejme për rreth 1 minutë kremin. Më pas shtojmë miellin e mbetur (mund të shtoni miell ekstra nëse ju nevojitet) derisa të përfitoni një masë brumi të butë, por që nuk ngjit.

Punojeni brumin për disa minuta mbi tavolinën e punës, duke e lyer fillimisht me miell dhe më pas përplaseni atë disa herë mbi tavolinë për të përfituar elasticitetin që ju kam sqaruar më sipër. E vendosim brumin në një tas të lyer me vaj, e lyejmë dhe masën e brumit nga të gjitha anët me vaj dhe e mbulojmë me membranë. E lëmë në këto kushte në temperaturë ambjenti për 1 orë.

Vijojmë me përgatijen e mbushjes. Në një tigan shtojmë gjalpin. Kur gjalpi të jetë tretur, hedhim galetën, sheqerin, kanellën dhe trazojmë për 2-3 minuta. Grijmë mollët, mundësisht në forma të rregullta (unë do shtoj më shumë mollë herën tjetër) dhe mbi to shtrydhim lëngun e një gjysëm kokrre limoni. Vendosni rrushin e thatë në ujë të vakët që të zbutet.

Kur brumi të ketë qëndruar 1 orë në qetësi e hapim atë mbi banak të lyer me miell dhe fillimisht e shtrojmë me pecin e trashë (do ndjeni se çfarë butësie dhe elasticitet ka ky brumë). Më pas me duar do vijoni të hapni brumin nga të gjitha anët. Do shihni sesi brumi do hapet lehtësisht duke u bërë shumë i hollë si në foto (në instagram të Bonbon Taste do shikoni disa video ilustruese të hapjes së petës).

Pasi peta të hapet mjaftueshëm vijoni si në fotot më poshtë. Fillimisht me gjalpin e tretur lyeni gjysëm e petës. Në gjysmën tjetër shtroni galetën e skuqur. Mbi të mollët dhe lëngun e limonit dhe në fund fare rrushin e thatë (pasi ta keni shtrydhur nga uji i tepërt). Lyeni me gjalp anësoret e petës nga pjesa e mbushur e strudel dhe filloni palosjen si në foto. Më pas me lëvizje rrethore krijoni strudelin tuaj.

  

Vendoseni strudel në një tavë ku keni shtruar letër për pjekje (pjesa e palosjes të jetë poshtë) dhe piqeni atë në 180 gradë për 30 minuta ose derisa të marrë një ngjyrë të artë të lehtë. E lini strudelin tuaj të ftohet, më pas e prisni dhe e servirni me sheqer pluhur. 

Një strudel shumë delikat në shije me një petë aq të hollë që shpërbëhet si petë bakllavaje 🤗❤.

Këshillë: këtë lloj pete mund ta përdorni për çdo lloj mbushje tjetër të ëmbël apo të kripur meqë shija e petës është neutrale. Unë për vete do e tentoj dhe me mbushje të kripura.

Shijoni fotot në vijim. Ju bëftë mirë. Ju dua 🤗❤🙏

Pasta në furrë sipas Rudinës.

Rudina është motra ime (goca e xhaxhait) të cilës ja kam vendosur vet emrin 🤗 dhe jam krenare ❤. Rudina ka disa vite që më ka surprizuar jo me talentin e saj në kuzhinë se atë e ka pas të lindur, por me përkushtimin e saj për të gatuar dhe kur nuk ka më fuqi nga lodhja. Është një nënë e devotshme dhe fal shumë dashuri edhe përmes ushqimit që del nga duart e saj.

Unë me Dorinën, motrën tjetër të Rudinës e kemi shijuar shumë në fëmijërinë tonë të ngrënën bashkë, pasi Rudina dhe një vezë të skuqur me sallam, djath e domate e trajtonte si pjatë restoranti me 5 yje 😍. Dhe më jo nepsqari do bëhej me neps nëse sheh sesa me klas e shijon Rudina ushqimin hahaha, ndaj kur thotë Rudina e shijshme gatuaje, mos hezito 2 herë për ta provuar 😍.

Meqë Rudina jeton në Itali dua ta prezantoj tek Blog-u me një recetë tipike italiane, që i ngjan lazanjës, por që ka ca element më shumë dhe quhet “Pasta al forno” versioni i Rudinës 🤗. Këtë recetë unë e gatova kur më erdhi në shtëpi me familjen miqtë tanë Suela dhe Romir Zalla. Kjo tavë i  mbledh shumë mirë 8 vetë të rritur dhe mbetet po e servirët në darkë (meqë mundohemi të  hamë pak 😜). Ndaj gatuajeni për miqtë tuaj dhe do i kënaqni ata pa masë 🧡.

Shënim: kjo recetë është gatuar 1 ditë para se të filloja dietën 🙄😎

Për Pasta në Furrë na nevojiten:

Për kimën:

300 gr mish të grirë

300ml salcë domate pure

1 degë selino

1 karrotë

½ lugë çaji kanellë

Piper

Arrë moskat e grirë

Për beshamelin:

4 lugë gjelle gjalp

4 lugë gjelle miell

1200 ml qumësht

Arrë moskat

Të tjera:

Pasta rigatoni

300 gr mozarela

100 gr djath i grirë parmigiana

4 lugë gjelle vaj

Përgatitja:

Për përgatitjen e kimës dhe beshamelit, ju lutem referohuni këtu.

Tani që kemi gati pasta rigatonit të zjerë “al dente”, kimën, beshamelin, mozarelën e prerë në copa jemi gati të fillojmë shtrimin e tavës.

Fillimisht përziejmë rigatonin me kimën si në foto. 

Shtojmë 1 garuzhdë beshamel në fund të tavës dhe mbi të gjysmën e masës së pastës. Mbulojme me mozarela në copa dhe përsëri një garuzhdë beshamel. Hedhim gjysmën e mbetur të pastës, copat e mozarelës dhe gjithë beshamelin e mbetur.

  

Mbulojmë me djathin e grirë dhe vendosim në furrë në 200 gradë për 30 minuta ose derisa pasta të marrë këtë ngjyrë.

Lëreni pak të ftohet para sesa ta servirni dhe shijojeni me miq të mirë, verë të mirë dhe të qeshura pafund. Ju dua ❤❤❤.