Lazanja BonBon

Në përgatitjen e lazanjës në shtëpinë tonë, unë nuk ndjek një recetë të lexuar apo parë në ndonjë video gatimi. Thjesht kam përvetësuar stilin e mamit dhe këshillat që kam marrë nga kunata ime në itali. Në përgatitjen e lazanjës unë filloj me përgatitjen e kimës dhe më pas me përgatitjen e beshamelit. Të dyja këto masa përfundojnë gatimin njëkohësisht dhe janë gati për shtrim. Me këtë ritëm përgatitje dhe pjekje, lazanja në shtëpinë tonë është gati për maksimumi 1 orë e 10 minuta. Nëse ndiqni shpjegimin tim si më poshtë, as rrëmuje dhe as enë të hallakatura nuk do gjeni mbi banak, siç ndodh rëndom me përgatitjen e lazanjës :).

Përbërësit për kimën

300 gr mish të grirë

1 shishe salcë domate pure

1 degë selino

1 karrotë

½ lugë çaji kanellë

Piper

Arrë moskat e grirë

Përbërësit për beshamelin

4 lugë gjelle gjalp

4 lugë gjelle miell

1200 ml qumësht

Arrë moskat

1 pana 200 ml

Kripë

Përgatitja

Pastrojmë karrotën dhe selinon dhe presim në kubikë. Vendosim mishin në një tenxhere ku shtojmë një filxhan kafe me ujë dhe trazojmë sa mishi të marrë ngjyrë për 2-3 minuta.

Këshillë: nëse doni që mishi grirë mos t’ju mblidhet toptha toptha kur bëni kimanë, gjithmonë shtoni ujë kur gatuani mishin, pasi vaji i nxehtë e forcon mishin e grirë dhe e mbledh në topa, duke mos e lënë të shkrifët. Këtë ma ka mësuar tezja ime Arjeta dhe funksionon gjithmonë.

Shtojmë përimet e grira, kaurdisim 1 apo dy minuta përpara se të hedhim salcën. Shtojmë salcën. Shplani shishen mirë :) dhe shtojani masës. Rregulloni me kripë, piper, kanellë dhe arrë moskat dhe lëreni të ziejë në zjarr të avashët për 15 minuta.

Në një tenxhere shtojmë gjalpin derisa të shkrij. Hedhim miellin. Trazojmë derisa mielli të marrë pak ngjyrë. Heqim nga zjarri dhe lëmë 2 minuta në qetësi, përpara se të shtojmë qumështin e ftohtë. E hedhim qumështin avash avash dhe trazojmë pa e vënë në zjarr derisa të krijohet një masë kremoze. E vendosim tenxheren e beshamelit në zjarr, shtojmë sasine e mbetur të qumështit, rregullojmë më kripë dhe arrë moskat dhe e lëmë të ziejë duke e trazuar herë pas here.

Kur beshameli të jetë gati, i hedhim një pako pana për gatim 200 ml. Këtë ma ka mësuar kunata që jeton në Itali dhe vërtet që i jep beshamelit një kremozitet, qëndrueshmeri dhe ngjyrë shumë të bukur gjatë pjekjes.

Fillojmë me shtrimin e lazanjës. Siç më ka mësuar mami Lika gjithmonë lyejmë fundin e tepsisë më pak kimë dhe beshamel. Këto përmasa mua me lejojnë të krijoj tre shtresa me pete lazanje. Në çdo shtresë që unë hedh kima, hedh dhe disa lugë beshamelë.