Sushi sipas Odetës

Sushit e Odetës gëzuan të madh e të vogël, njerëz dhe kafshë të bukura shtëpiake 😍😍. E kishim menduar dhe parashikuar këtë ditë 1 vit më parë derisa më në fund u bë e mundur. Odeta i adhuron sushit dhe prej kohësh i përgatit vet. Unë refuzoja të studioja recetën online sepse doja ta mësoja direkt me praktikë. Ndaj po prisja kur Odi të ishte gati. Dita erdhi muajin e kaluar, por për arsye të ngjarjeve madhore dhe të dhimbshme për vendin tonë në muajin Nëntor, receta po gjen sot ditën e postimit. Odeta na tregoi gjithë proçesin, por shumë shpejt u bashkuam të gjithë në formimin dhe rrotullimin e sushit 😍. Atë ditë në kuzhinën e Mirës (mami i Odit) u gatuan dhe plot receta të tjera dhe Roi (qeni) ishte shijuesi dhe kritizeri kryesor në vlerësimdhënien për shijen 😍❤.
Nga ajo ditë unë i kam gatuar sushit dhe disa herë në shtëpinë time dhe ju them një gjë me bindje: sushit gatuhen dhe haen në grup. Është një ushqim që e ndan me shumë kënaqësi me të tjerë ose fton njerëz të tjerë t’i shijojnë me ty, është një gatim që sjell gëzim dhe fotot në këtë postim do flasin më shumë sesa fjalët e mia. Këtu unë do përfshij kostot e çdo blerje dhe zgjedhjet tuaja më ekonomike për mbushje, por padyshim shumë të shijshme.🙏❤

Përbërësit për rreth 50 – 60 copë sushi

8-10 alga (seaweed)

500 gr oriz për sushi

200 gr krem djathi (Philadelphia)

1 kastravec

1 acokado

100 – 150 gr salmon i tymosur

Salcë soja për servirje

Mbushje Opsionale 1:

2 kuti ton në ujë (i kulloni mirë)

2 lugë çaji majonezë

1 kastravec

Mbushje Opsionale 2 ose California Roll:

Crab sticks - mish gaforre

Avocado

Kastravec

Mbushje Opsionale 3 Maki Roll:

Salmon

Avocado

Krem djathi

Mbushje Opsionale 4 Maki Roll

Avocado

Crab stick

Krem djathi

Mbushje Opsionale 5 Maki Roll:

Avokado

Ananas

Krem djathi

Kosto fillestare kur blen përbërësit e sushit për herë të parë:

2500 lekë 50 fije alga - Neranxi

Tapeti bambusë 650 lekë - Baronesha

100 gr salmon I tymosur 750 lekë - Spar

500 gr oriz për sushi 320 lek - Conad

Krem djathi 200 gr, 250 lekë

Avocado 1 kokerr, 230 lekë
Salcë soja - 250 lekë në çdo market

Total: 4950 Lekë

Kosto kur përgatit sushi herën e dytë:

Algat 0 lekë (se ke mjaftueshëm për të bërë disa herë nga blerja me 50 fije)

Oriz 320 lekë

Crab stick 300 lekë - Conad (zëvendëson Salmonin)

Avocado 230 lekë

Krem djathi 250 lekë

Total: 1100 Lekë për 60 copë sushi

Kosto kur përgatit 1 mbushje tjetër:

Oriz 320 lekë

Ton 2 pako 400 lekë

Majonezë 200 lekë

Avocado 230 lekë

Kastravec 50 lekë

Total: 1200 Lekë për 50 – 60 copë sushi

Kështilla që do ti kuptoni dhe nga fotot:

1. Blini paketimin me alga 50 copë për 2500 lekë sesa atë me 10 copë për 700 lek. Do keni nje goxha kursim kur të bëni sushin herën e 2,3 dhe të 4 me të njëjten qese algash

2. Orizit të sushit të gatuar i duhet hedhur brenda uthull orizi me pak sheqer. Mos e blini uthullën e orizit se është shumë e shtrenjtë në shishe të vogël. Ose përdorni uthull molle pak të holluar dhe sheqer, ose uthullën e krijuar nëse keni bërë turshinë e xhinxherit si unë.

3. Orizin mbi algë hapeni cep e më cep se kështu siguroni që gjatë prerjes mos t’ju shkojnë dëm pjesët anësorë. Jo se shkojnë dëm se haen, por nuk duken bukur në pjatë se janë pak të “deformuara”.

4. Sushit e përgatitur haen shumë mirë pasi t'i kesh lënë të ftohen në frigorifer (mendimi im)

5. Oriz për sushi ka dhe në dyqane dhe në marka të tjera. P.sh. unë gjeta 1 qese për 240 lek kg.

6. Në vend të salmonit të tymosur përdorni salmon të gjallë që e gatuajmë me pak vaj ullliri.

7. Tapeti bambusë duhet veshur me qese celefoni para se të filloni të mblidhni sushi.

8. Kur bëni sushit që kanë sipër orizin dhe jo algën, mbani pranë vetës një tas të vogël me ujë ose peshqir të njomë që të njomni gishtat pasi orizi është ngjitës.

9. Kur prisni sushit mbani gjithmonë një peshqir të lagur pranë për të fshirë thikën, sidomos kur prisni sushit me krem djathi.

10. Përpara sesa ta gatuani orizin për sushi, shplajeni mirë atë dhe më pas hidheni në tenxhere. I shtoni ujë të ftohtë dy gisht mbi nivelin e orizit. Derisa uji të marrë valë lëreni orizin në flakë të lartë, më pas uleni flakën dhe lërëni të ziejë. Ky oriz nuk do brenda as kripë dhe as gjalp. Pasi të keni mbaruar zjerjen i shtoni 4 lugë gjelle uthull molle të holluar, të cilën e ngrohni në një enë bashkë me një lugë çaji sheqer kaf derisa sheqeri të tretet. Orizi është gati për mbushje pasi të jetë ftohur ose të paktën i vakët.

11. Në vijim fotot tek Odi kur ajo përgatiti sushit për herë të parë për ne dhe më pas fotot tek shtëpia jonë. Fotot nuk kanë nevojë për koment pas gjithë këshillave më lart sepse flasin qartë. Të mbledhësh një sushi me tapet është gjëja më e lehtë në botë 🤪😍😋.

12. GOOD LUCK dhe ju bëftë mirë. ❤😋🙏🤗

13. Harrova më të rëndësishmen, fillimisht mbaroni së përgatituri gjithë mbledhjet e sushit dhe pastaj i prisni ato se do fitoni shumë kohë. Dheeee jepjani bashkëshortit/shokut/partnerit tuaj t'i presi ato, se do ju lezetojë shumë 🤪😍❤.