Tiramisu BonBon

Do lejoj ta emërtoj tiramisunë sipas emrit tim, sepse në të vërtetë tek receta e përgatitjes së kremit kam ardhur vet, duke parë disa receta Tiramisu, kam ruajtur ato elementë që më kanë pëlqyer më shumë. Meqë maskarpone është krem djathi me shije neutrale, unë preferoj t’i shtoj vetëm vezë të freskëta dhe siç e kam theksuar tek receta e mëparshme “La Bomba”, të verdhat e vezës bashkë me sheqerin, unë i kaloj në banjomari, duke krijuar një krem që quhet “zabaglione”.

Disa nga recetat përdorin krem qumështi në vend të të bardhës së vezës. Kur janë vezë të freskëta unë preferoj këtë të fundit, në vend të “pana të ëmbël”, e cila është zëvendësuesi më i zakonshëm i kremit të qumështit që nuk është dhe aq i kollajtë për tu gjetur në dyqan.

Tiramisu është një ëmbëlsirë që bëhet shumë shpejt dhe që mund të ndihmojë gjithë familja dhe djemtë e mi nuk u kursyen në përgatitje dhe "ekzekutim" të saj :). Tava ku ne shtrojmë tiramisu është pak e madhe dhe meqë unë qëllimisht dua të ekzagjeroj në sasi me kremin e tiramisu, përbërësit për tavën që do shikoni në foto janë:

Përbërësit:

500 gr djath mascarpone

4 vezë fshati

1 pako me biskota savoiardi

5 lugë sheqer

kafe e çastit

30 ml konjak

kakao pluhur

Përgatitja

Ndajmë të verdhat nga të bardhat e vezëve dhe shtojmë 3 lugë sheqer tek të verdhat, të cilat i kemi hedhur në një tenxhere të vogël. Vendosim tenxheren me të verdhat në një tenxhere më të madhe me ujë që po zien dhe trazojmë më një rrahëse vezësh për 4-5 minuta, derisa sheqeri të tretet e të jetë krijuar një krem i trashë. Nga ana tjetër rrahim të bardhat e vezës, derisa ato të mpiksen aq sa mos të bien nga tasi kur e kthejmë me kokë poshtë, shtojmë 2 lugët e mbetura me sheqer dhe rrahim dhe për 2 minuta të tjera. Në këtë proçes dy çunat e mi ndihmuan me shumë dashuri :).

Në një tas hedhim maskarponen, shtojmë zabalionen, rrahim me rrahës elektrik për 2 minuta. Shtojmë të bardhat e vezëve dhe trazojmë. Kremi është gati.

Në një enë tresim pak kafe të çastit, shtojmë konjakun dhe lëmë mënjanë. Tani nuk na mbetet gjë tjetër veçse të shtrojmë tiramisunë. Hedhim pak krem në fund të tepsisë. Fillojmë të zhysim biskotat një nga një tek kafeja dhe shtrojmë në tepsi. Hedhim mbi to shtresën e parë të kremit, pluhurim me kakao. Vazhdojmë proçesin përsëri të shtrimit të biskotave, por në drejtim tjetër.

Hedhim shtresën e fundit të kremit, pluhurosim me kakao dhe vendosim në frigorifer për gjatë gjithë natës.